政情：咖啡拉花盧偉國唔捨得飲自己落肚
咖啡係唔少都市人生活嘅一部分，唔飲過咖啡都好似唔精神咁。工程界立法會議員盧偉國（WK）日前喺北京出席咗一個咖啡活動啟動禮，即場飲咗唔少款咖啡，其中一款係用電腦輔助拉花，將佢個樣「拉」咗落咖啡度，WK見到呢杯咖啡嘅拉花圖案都大讚真係好似佢自己，又話唔捨得飲，笑言點可以飲自己落肚咁話。
試飲檸檬茶溝咖啡
WK見到有自己個樣嘅咖啡都即刻用手機影張相留念，之後先慢慢飲，佢話自己飲得好小心，一路飲見到個拉花仲保持到，冇走到樣都覺得好驚訝，而實際上，當日佢仲飲咗四杯唔同口味嘅特色咖啡，包括有燕麥口味嘅咖啡，檸檬茶加咖啡嘅凍飲等。話時話，檸檬茶溝埋咖啡聽落有啲古怪，不過WK話飲落幾特別、幾好飲，仲話覺得四杯咖啡都各有特色，值得試吓喎。至於飲完四杯咖啡後怕唔怕夜晚瞓唔着，WK就話因為個活動係朝早舉行，所以冇問題喎。