政情：新舊鴿過招 柴文瀚向羅致光挑機

建議統籌訊息 簡化程序

柴文瀚話，現時每當有長者失蹤，多個政府部門包括警方、社署、房屋署等都會重複工作，例如向失蹤者家屬索取資料，搞到家屬要聽好多次電話，如果涉及多條屋邨，分分鐘要將個失蹤情況講成十幾廿次！柴形容係費時失事，對家屬而言更加係非常困擾，建議政府成立一個專責中心，統籌晒所有相關單位，收發訊息都要一手包辦，程序上就可以簡化得多，家屬喺慌失失時個心都可以定啲。

睇天眼都要經繁複步驟

另一個問題係關於喺安老院走失嘅長者，原則上所有安老院大門都設有閉路電視，但有影片唔代表可以隨便睇，事關門口位置並唔係完全屬於安老院嘅管理範圍，好多時有關程序仲要經過房屋署或醫院管理局等部門，搞好多行政程序先有片睇。柴強調，安老院門口嘅影片好重要，事關失蹤長者出門後向邊個方向走，係搵番佢哋嘅一大關鍵，如果程序繁複、處理時間太過長就會耽誤尋人，所以柴認為要簡化成個程序，盡快可以睇到影片先至得。

睇番社署提供嘅資料，社署轄下嘅安老牌照事務處不時都有向安老院提供相關資料，亦有提醒安老院加強員工照顧認知障礙症長者嘅技巧同方法，以及安裝預防患者游走嘅設施等。不過，柴覺得即使有預防措施，但總會有意外發生，所以仍有必要完善處理程序。雖然柴建議成立嘅專責中心未知會由邊個部門統籌，但係社署都有表態可以喺公營安老院上先作嘗試，管理社署嘅羅致光顯然難以置身事外，睇怕羅今次都要諗清諗楚點樣執行，免得到時又被全城炮轟「高智低能」喇！