中環出更：做議助停薪留職 羅冠聰又被DQ？
今屆立法會發生宣誓風波，香港眾志羅冠聰更被取消立法會議員資格（DQ），佢其後就喺立法會議員區諾軒嘅議員辦事處出任全職政策顧問，月薪二萬二千元。但翻查最近半年區嘅申領開支資料，羅喺去年九月開始已轉為兼職職員，月薪大減至只有七千五百元，去年十月返工已返得四十個鐘，連人工都減半，至去年十一月更開始停薪留職添。唔通佢返工返得太少，搞到被區諾軒DQ ？
區諾軒回覆時就話，羅冠聰要停薪留職係因為去年年尾要應付考試，今年二月已經以兼職職員身份復工，主要都係負責保安範疇嘅政策研究工作。就讀嶺南大學文化研究系嘅羅，讀足六年今年一月終於畢業，點解唔轉番做全職呢？區就話，唔知羅係唔係打算繼續進修喎。
話要多啲時間讀書
羅冠聰話，去年底佢確係為咗多啲時間讀書，準備考試，所以冇返工，依家已經復工喇，至於會唔會繼續進修，又或者搵其他工作，佢就未有決定住。另外，眾志另一成員梁延豐原本都喺區諾軒議辦任全職媒體主任，月薪一萬四千元，但去年六月中已離職，區就話因為對方已搵到另一份工喎。
卓妮