中環出更：馬清楠行善一代傳一代
古語有云：「勿以善小而不為。」做慈善從來都唔應該計算多定少嘅。保良局副主席馬清楠早前出席保良局周年慈善酒會時話，做善事最緊要平常心，又提到自己做慈善都係受屋企影響，因為佢嘅爸爸以前都做過保良局主席，所以佢細細個就已經經常出入慈善機構做義工服務社會，幫助有需要嘅人咁話。
馬清楠又話，依家唔單止佢親身繼續參與慈善，仲將呢份精神一代傳一代，近年佢就帶埋細女Katie去內地山區做義工，等個女可以親身了解內地貧苦情況，特別係山區學校環境，等個女睇吓山區學校喺缺乏資源下點樣教學、遇到啲咩困難等。雖然Katie年紀輕輕，但馬清楠都讚佢好幫得手，仲話佢依家都已經成日去做義工喇。
湯振傑循體育途徑助人
總理湯振傑曾經係劍擊運動員，所以經常會循體育途徑做善事，例如集合唔同項目嘅運動員組成騎師隊、划艇隊等，一齊參加「送暖行動」、「慈善愛心跑」等活動，又去深水埗等較多基層人士嘅地區派發物資，探望吓社會上嘅弱勢社群，了解佢哋嘅需要。湯仲話，細細個時父母已經教佢要盡力幫助人，所以依家人大咗就積極參與慈善活動。湯又話，參加過咁多活動後，覺得香港人其實一啲都唔冷漠，熱心助人嘅人大有人在。
總理鄧宣宏雁同老公鄧鉅明就話，到咗佢哋呢個年紀，家庭、事業、住屋等多方面都已經穩定落嚟，毋須再為餬口而奔波，所以可以放多啲時間喺社會上有需要嘅人度。鄧鉅明特別強調，錢係帶唔走嘅，所以應該幫得就幫，仲教埋佢啲仔女都要咁做。佢現時喺英國讀書嘅細仔就經常跟老師去到偏遠郊區做義工，佢認為個仔喺外國做義工可以藉此放眼世界，而佢見到個仔幫人愈幫愈開心，佢自己都開心埋一份喎。
卓妮