我有正能量：抗癌同跑
馬拉松近年於本港成為風潮，每逢有大型比賽都會成為城中熱話，市民爭相報名參與，當中除了有追求成績的跑手，亦有一群成功克服或正在積極面對癌症的健兒，他們組成跑友團，除了定期練跑及參加比賽，更重要的是互相勉勵，在康復路上以運動對抗負面情緒。
「面對癌症有三部曲，確診、治療同埋康復，頭兩樣要靠醫生，最後康唔康復到就要靠自己。」今年六十一歲、年半前切除前列腺的癌症康復者劉宏章指，面對癌症除了身體要承受痛苦，最大困難莫過於克服心魔，多出外與人接觸，「以我為例，我本身好鍾意跑步，但切除前列腺後會有尿滲問題，嚴重影響日常生活，但係我無收埋自己，反而要更加積極，重新訓練增強肌肉強度。」
日跑10公里 重練括約肌強度
手術之後，他參與癌症資訊網的病友跑步團體——愛跑友，更成為團長，持之以恒每日練跑十公里，術後至今已大大改善尿滲問題，他更以過來人身份呼籲病友多做運動，「尤其係患前列腺癌嘅病友，跑步可以增強番括約肌能力，千祈唔好怕滲尿唔出街唔做運動，要的起心肝做運動先可以慢慢去改善呢個問題，我就係最好嘅例子。」
家人朋友支持 比藥物更有效
至於愛跑友副團長、同樣從前列腺癌中康復過來的伍卓康，由○四年病發至今一直保持做運動的習慣，跑步、行山甚至健身都有參與，現時每星期最少跑兩次長跑，他認為，運動除能令患者的身體變得更強壯，更重要的好處是在過程中和其他人溝通，從心靈上獲得慰藉，「要出嚟見多啲人，同埋識多啲朋友，有時候身邊人嘅鼓勵可以幫到你，你亦都可以幫到人。」
另一位跑友、曾於一一年患乳癌的Ann同樣認為面對癌症，家人朋友的支持比藥物更有效，「我鍾意叫啲朋友打完針先嚟探我，因為打完針係最辛苦最痛，見吓人可以分散注意力，總之唔好一個人面對，做完治療之後我就集中做運動，跑步、龍舟同單車都有玩，身體自然慢慢會強壯番。」
圖：朱偉坤
文：陳名仲