政情：橫額寫錯做「開日大嶼」 民記勁瘀
香港房屋問題嚴重，政府就話係土地問題，早前更提出「明日大嶼」填海計劃，但計劃備受爭議。荃灣區議會昨開會就「明日大嶼願景」進行討論，多個政團喺開會前到區議會請願。其中民建聯（民記）就展示多張寫上要求盡快展開「開日大嶼」相關研究嘅橫額。「開日大嶼」唔通係民記新建議？難怪同場嘅荃灣區議員譚凱邦（Roy）都叫佢哋解釋。
民記荃灣區議員古揚邦昨亦在場，Roy見到佢哋張橫額即刻指住嚟笑，仲開咪大叫民記嘅人解釋乜嘢叫「開日大嶼」。現場有人見狀一度想收起橫額，但被人阻止。都係嘅，印錯嘅橫額同潑出去嘅水一樣收唔番！
陳恒鑌：向公眾致歉
同樣都係民記荃灣區議員嘅立法會議員陳恒鑌，雖然橫額上印有佢個名，但佢就唔在場。佢話尋日趕唔切去參與呢次請願，所以事前都冇審視到啲橫額，仲澄清佢哋橫額上所指嘅係「明日大嶼」，可能係同事搞錯咗，佢哋已經知錯，並向公眾致歉喎。