中環出更：甩轆冇拉票 傳黎穎瑜喊冤
民政事務局上月甩轆，喺立法會人事編制小組委員會申請保留三個監察西九文化區工程嘅職位被否決，矛頭直指負責政治游說工作嘅民政局局長政治助理黎穎瑜（Jade）冇做好拉票工作。事後有政府中人透露，大家見到新聞後即刻去慰問Jade，當事人就「喊冤」話唔關佢事，係局方評估項目冇乜爭議，所以冇人叫佢去拉票，點知就出事嘞！
生日都要畀人鬧
據了解，喺人事編制小組會議嘅翌日，即係二月二十三日，亦係全城鬧爆佢當天，正好係Jade嘅生日，相信呢份生日「大禮」實係好難忘！而同Jade較為相熟嘅同事都知佢翌日生日，好好心安慰佢話大家都明白嘅，更有其他政助教路叫佢得閒喺立法會見吓人喎。
正所謂經一事，長一智，據了解，Jade亦好聽話，上月廿五日嘅民政事務委員會開會，即刻入會議室內坐定定，等大家見到佢。姑勿論係局內錯估形勢，抑或係冇人叫拉票，作為政助就要好有政治智慧，只要有心由政總行過立法會都好容易，同議員打聲招呼，咁咪唔會頻頻出事囉！依家就好好諗吓嚟緊可以點補鑊，否則三個職位逾時冇得保留，就真係成為千古罪人嘞！
卓妮