中環出更：旅行愈玩愈偏門 王賜豪：趁後生開眼界
香港人去旅行愈玩愈偏門，全因熱門嘅旅遊地點已經遊覽過。卓妮早排見到唔少名人都希望前往冷門嘅地方開眼界，但香港女童軍總會副會長王賜豪就話要遷就老人家而難去到喇！
王賜豪選擇旅遊目的地要遷就老人家，而自己雖然有啲特別嘅山想去行，亦因工作忙碌而遲遲未能成行，大嘆擔心再拖多幾年後，年紀漸老而應付唔到喎，不過睇佢外表同埋標準嘅身形，似乎只係佢過慮啫！
當日活動係香港女童軍總會新春團拜，香港總監李周美枝、副會長陳曦齡、名譽副會長王嘉恩、朱鄧麗萍等都有出席，連國際專業保險諮詢協會會長羅少雄亦有現身撐場。
羅少雄：最重要係買重保險
羅少雄就話認同有啲地方要趁後生去，而社會上有唔少人去過熱門旅遊地點，所以難免會轉去探索較為落後、治安亦較為危險嘅冷門地方。佢就建議跟有經驗嘅旅行團出發，而最重要都係買重保險，而現時保險業競爭大，唔少旅遊保險覆蓋範圍已經大增咁話，就連恐怖襲擊都有機會有得賠。
王嘉恩亦話旅行為放鬆同減壓，行程主要都係食同埋購物，所以會選擇去熟悉的大城市。不過並唔代表唔會發掘新事物，事關會問熟悉當地嘅老友，從中再發掘新景點，強調唔會一成不變，否則就嘥咗難得嘅旅行機會。
旅行要預先準備，就連平日工作、搞活動等都應該做足功課。李周美枝話自十二歲加入女童軍，訓練出井井有條嘅生活態度，好似有時搞戶外嘅活動時，更要有兩手準備以應對惡劣天氣等突發事情。
卓妮