中環出更：財爺齋噏兩粒鐘 議員玩手機搵周公

勞工界陸頌雄喺會上被影到睇緊手機螢幕保護貼，唔通佢覺得司長講嘢太悶，定發現太易遭記者影到手機內容而搵定防窺貼？

陸頌雄睇Mon貼 田北辰瞓着咗

佢解釋話當時睇緊網民對預算案嘅評價，咁啱見到有保護貼廣告，而最近又考慮換新，所以先撳入去睇咗一陣啫！佢補充話電話螢幕非平面，要搵合適保護貼好困難，加上用緊嘅太硬身，有啲位置接觸不良喎。佢仲話有留意司長發言，內容唔悶但冇乜驚喜囉！

醫學界陳沛然就遲到大約十五分鐘，仲要帶埋手提電腦開會，竟然第一件事就大玩Facebook，仲非常小心咁用紙遮住電話去覆短訊添！不過，佢其實係為預算案做懶人包，喺Facebook發貼講重點，為網民進行實時直播，都算係做正經事。

而以往政府宣讀預算案、施政報告或者答問會時，總有幾個經常被捉到瞓覺嘅「慣犯」，今次就有飲食界張宇人長期低頭，疑似瞓着囉，最後佢離開咗會議廳兩次後就頂到最尾，可能離開先回到魂，唔知係咪有傳染，該黨嘅批發及零售界議員邵家輝亦閉目養神，而實政圓桌嘅議員田北辰直情瞓着咗。

陳沛然（圓圖）玩Facebook發貼講預算案重點。（陳宛彤攝）	張宇人似乎受周公急召。（陳章存攝）	邵家輝（前）閉目養神，而田北辰（後）直情瞓咗。（羅錦鴻攝）

至於另一名「慣犯」進出口界黃定光都有閉目養神，但就未曾離開過座位。不過佢似乎捱得好辛苦，不時見佢捽眼做眼部運動，又會轉動手腕伸展，但間中都見佢做筆記o架！

卓妮