中環出更：考海關穿梯易肥佬 鄧以海教去公園操
近年年輕人想搵份穩定優差愈嚟愈難，紀律部隊就成為搶手工種，應徵人數仲屢創新高，不過又唔代表年輕人體能Fit過上一代。海關關長鄧以海尋日出席一個活動時話，依家啲年輕人體能兩極化，仲教路如果想考海關，可以去公園操練喎。
鄧以海話，好動嘅後生仔體能非常好，但亦有啲係只掛住打機，所以體能好差。海關嘅體能測試中以穿梯測試最多人唔合格，佢就話呢個測試係要訓練考生嘅靈敏性，紀律部隊當中亦只有海關要考呢一項。佢又教路話公園同郊野公園都有啱用嘅訓練設施，有意投考海關嘅人可以去操練。
曾國衞：制服對年輕人有吸引力
同場仲有入境處處長曾國衞，佢話自己年輕時冇乜娛樂，所以只會通山跑，所以當年唔使為體能測試做特訓，就算依家接受一般體能測試，都有信心可以過關，果然夠晒Fit。佢又話，制服對年輕人有種吸引力，形象比較正義，所以認為現時投考紀律部隊人數多，同市道嘅關係並唔大。
尋日活動其實係保良局嘅慈善步行，副主席馬清楠、顧問局成員陳細潔同節目籌委會主席顏肇臻都在場，而顏肇臻嘅父母仲特登嚟撐場。顏肇臻媽媽顏寶鈴話，父母要放手先可以令子女長大，依家唔少年輕人為追求穩定，一畢業就投身公僕行列，但佢反而覺得應該要趁年輕出去打拚或者搞吓小生意。不過佢都認為，只要有上進心，就算入咗政府工作，都會比較快得到晉升機會。
卓妮