政情：公民講場：中年論惹火 羅致光賴公眾斷章取義

政府早前突然將長者綜援申請門檻提高，遭狠批涼薄，勞工及福利局局長羅致光更火上加油發表「中年論」，話當大家都一百二十歲，六十歲嘅人係啱啱中年。羅致光尋日出席電台節目就認衰話，說話唔好聽、唔啱聽會引發社會反應，人類事實上唔會有一百二十歲。不過轉頭佢就賴皮話當日口快將「中間」講成「中年」就畀人斷章取義，公眾冇理會前文後理，自己用邏輯語言畀人當政治語言去聽喎。智商高嘅羅致光可能層次高啲、離地啲，要用「邏輯語言」去講理論，唔知佢係咪忘記自己做緊政治工作，大家鬧佢涼薄嘅原因，唔止係說話，仲有政策呢？