政情：楊全盛失聲老婆請「食檸檬」
香港電競總會會長楊全盛（Eric）近日帶隊到日本千葉出席一個電競活動前夕，喺社交網站透露自己失咗聲，而佢接受查詢時仲話太太請佢「食檸檬」添，唔通Eric禍不單行？原來唔係，佢話太太見佢冇時間睇醫生，畀咗兩個檸檬佢，叫佢飲多啲檸水，快啲好番喎！
自嘲要靠個樣搵食
佢話，自己病情唔算嚴重，只係有少少咳同鼻水，冇發燒，最大問題係失聲，自嘲要「靠個樣搵食」。唔少老友見到佢咁，就畀咗好多喉糖、消炎藥佢，搞到佢帶咗一大袋藥去，不過好彩今次去日本，唔使同一大班人講嘢，只需要對住翻譯員講就得，可以調低聲量令自己舒服啲，同其他人交流時，亦唔算有太大影響。
Eric仲話，失聲唔緊要，最重要係對眼冇事，事關佢今次去偷師，靠對眼多過把口，例如睇吓人哋啲電競比賽嘅安排同登記制度等，加上電競現場有好多Cosplay咁話喎。睇嚟佢今次大飽眼福喎，唔知佢老婆知唔知呢？