中環出更：開台式奶茶店吳鄭慧賢試飲唔怕肥
台式珍珠奶茶嘅熱潮不退，連香港福建社團聯會前主席吳良好嘅新抱、仁愛堂總理吳鄭慧賢（慧慧）最近都攞咗一個台灣品牌嘅代理權，到福建、廣東等地大展拳腳。早前慧慧出席仁愛堂周年慈善餐舞會時，講起最近為咗籌備第一間分店開幕，密密試飲近二百杯，結果肥咗廿磅，要去美容院收身。見佢咁苗條，相信同佢落力湊小朋友都有啲關係啦！
年紀輕輕已有五名子女嘅慧慧，當晚帶埋兩個仔到場，見佢哋好精靈、百厭咁周圍走，睇嚟慧慧唔使刻意減肥，湊住一班小豆丁都自然瘦喇！佢話自己好鍾意飲手炒黑糖珍珠奶茶，飲落覺得好幸福，所以唔理係咪肥，飲咗先算喇！
鄭凱琳湊仔女湊到瘦
仁愛堂總理許友堅嘅太太鄭凱琳都係湊小朋友湊到瘦嘅人辦，佢笑稱當晚唔敢帶三名子女一齊嚟，因為湊住佢哋，自己就好難保持優雅。現時佢全職喺屋企照顧小朋友，形容有時只需一秒時間，自己就會變身哥斯拉喎！真係幽默，不過又確係講出唔少媽媽嘅心聲。
當晚好多現任及前任董事局成員都踴躍出席呢場年度盛事，包括前副主席陳鑑光（Charles），仁愛堂主席羅台秦及丈夫戴澤良亦邀請好多老友齊去歡聚。見到Charles自然要追問佢考機師牌嘅進度，點知佢笑住宣布暫停學揸飛機嘞，因為加拿大規定每半年就要飛三十分鐘，佢冇飛就要再重新嚟過，所以暫時都係算罷了。佢最近迷上新嘅「興趣班」，就係上堂學金融分析知識，目標係考埋牌添！
卓妮