政情：行會成員又獻計 林健鋒倡設野豬保育區
近期野豬問題飽受社會關注，早前已有立法會議員兼行政會議成員提出，引入野豬天敵去減少野豬數目，之後又有區議員獻計將野豬送去無人島，避免殺死佢哋，而尋日同樣都係立法會議員兼行政會議成員獻上解決野豬嘅新方法，佢就係林健鋒喇，而佢嘅提問並非跟潮流，事關舊年三月佢已喺立法會上提出有關野豬口頭質詢。
議員批評港動物權益落後
尋日有一條有關動物權益嘅口頭質詢，唔少人關心寵物問題，但唯獨林健鋒關心野豬。佢話近期市民關心野豬並唔單止因野豬擾民、傷人，而係關注點樣減少人同野豬嘅衝突，尤其係擔心非洲豬瘟對市民同寵物嘅威脅。佢認為野豬避孕計劃成效不彰，數量不減反增，詢問會否考慮設野豬保育區，限制野豬活動範圍，減少擾民機會同傳播疾病囉！
食物及衞生局局長陳肇始就話，下星期嘅立法會環境事務委員會將討論野豬滋擾問題，屆時會提供解決方案咁話。
另外，有議員批評香港嘅動物權益落後，要求研究動物車廂及容許市民同寵物同行乘搭公共交通工具，但政府就話現時冇計劃喺非繁忙時間開放部分車廂畀動物使用。