顏樂楓要做港超佩奧爾
港超球會理文今季無論教練或球員都出現大變動，仍在陣中的顏樂楓獲委任為球隊副隊長，這位「新手隊長」期望能如偶像佩奧爾般散發感染力：「細個睇巴塞見到佩奧爾係一個好有激情嘅球員，佢唔會有好負面嘅情緒，只會將正能量帶畀隊友，甚至隊友想發脾氣，佢都係第一個走埋去拉住隊友。能夠將自己嘅情緒收放自如，又可以將隊友嘅情緒控制得好好，呢樣嘢係我其中一個學習課題！」
「光頭」顏樂楓即將踏入26歲，地位提升對他而言是成長的推動力：「以前我係一個比較脾氣大嘅球員，無論開心、唔開心，所有情緒起伏都會透過表情及行為反映出嚟。做咗副隊長後責任感大咗，唔可以咁易發脾氣，亦唔可以一見到隊友『蝦碌嘢』就笑到癲咗，要將情緒控制得比較平穩。至於球場外，我會主動啲去了解隊友嘅不同困難，會作為球員同教練之間嘅橋樑，無論係外援定本地球員，大過我定細過我，我都會去幫大家去溝通得好啲。」
同枱食飯助新兵融入
理文今季引入多位新球員，為協助他們融入，「光頭」透露下了不少苦功：「譬如去食飯，我特登唔坐埋去最熟嗰枱，主動去坐張大枱，然後叫隊友埋嚟一齊傾，因為食飯嘅時候係最容易令到大家咩都講吓，不過依家唔使喇，大家都好Close。」
對於球隊的成績，「光頭」亦認為多了一份責任：「成績唔好嘅時候，信心都會低啲，你會發現隊友同平時有唔同，佢哋踢得唔太好嘅時候，唔敢講咁多睇到嘅嘢，呢個時候要當冇事咁同佢哋傾偈，佢哋慢慢就會正常番，最緊要係令到隊波順暢啲，氣氛要繼續好。」
球隊以年輕球員掛帥，作為其中一個領導角色，他謂：「有時球場上大家類型唔同，我都畀唔到太多意見，但係佢哋頭一兩年踢職業，好容易跟咗青年軍個節奏去踢，畀完個波失咗就企喺度，呢啲時候我就會嗌佢哋一齊追番，喺球場上灌輸呢啲觀念。」
問到「光頭」今季目標，他自然以球隊為先：「最重要係球隊打番順，升上更高嘅排名，呢樣係我最大目標。我深信球隊順嘅時候，自己發揮都唔會差，依家我將成副心機放落去球隊，而唔係個人目標。」
圖／文：陳焌鏗