中環出更：容海恩誕B女 葉劉大讚係小美人
新民黨容海恩（Eunice）同該黨前政策總裁袁彌昌（Derek）嘅B女，尋日朝早九點二十八分出世，重三公斤。該黨主席葉劉淑儀大讚B女係小美人。被問到會唔會同B女上契，佢話要睇吓Eunice願唔願意嘞！
Eunice係香港首名任內生BB嘅女議員，佢尋日中午發咗張最新嘅全家福畀傳媒，B女眼仔都未打開，但相當得意，Derek全程都喺產房陪住佢。Eunice形容生B過程非常順利，仲話好快會帶BB同大家見面。
料下月預算案已重返立會
佢話B女出世都有排忙，希望B女夜晚會乖，唔會令佢哋咁辛苦，又話會努力學習做媽媽，預計下月底公布財政預算案時應該已重返立法會。至於確實幾多號返立會，就視乎復原時間同照顧BB嘅安排嘞！Eunice早前講過，預產期原本係年初一，擔心好難搵醫生，所以決定提早開刀生，早過「立春」，即係豬BB會變狗BB嘞！
葉劉大讚B女五官好精緻，面帶微笑，活像個小美人，相信將來必定係美人胚子。佢仲話今日會去探Eunice添！Eunice話B女未改名，葉劉就透露根據Derek屋企嘅族譜，個名要有個「昌」字，所以佢哋仲未諗掂。
卓妮