政情：張建宗口講重視長者福利 不提綜援風波
政府早前突然提高長者綜援門檻，下月起由六十歲提高至六十五歲，惹來社會及立法會猛烈抨擊，事後需再提交折衷方案。不過，政務司司長張建宗尋日參加一群獨居長者嘅團年宴時，不但隻字不提近日風波，仲話政府一向重視長者福利喎！
話港府假牙費都包埋
張建宗大賣口乖，話無長者嘅努力就無香港今日嘅成就，缺少佢哋嘅貢獻，香港唔會成為國際大城市，所以政府好重視長者福利。
張建宗跟住又大數香港長者福利政策，好似下月起嘅生果金、長者生活津貼、綜援等，全部上調百分之二點八，而另一個喜訊就係長者牙科服務福利，由七十歲降至六十五歲，資助額連鑲假牙費用都包括到，直指長者有棚好嘅假牙，食嘢好啲、營養好啲、生活意義都好啲，改善埋生活質素咁話。張建宗講到咁美好，唯獨就無提到提高合資格長者年齡，今鋪擺明報喜不報憂喇！