政情：蔣麗芸發言 一日兩惹笑
尋日立法會公務員及資助機構員工事務委員會開會，傾緊未來會議可以跟進咩議題，唔少議員都好熱心爭住舉手，包括有議員葉劉淑儀、葉建源及潘兆平等，稍後主席范國威叫「葉議員」發問，葉劉就開口講嘢，點知議員蔣麗芸（Ann）大大聲話，呢位係葉劉淑儀而非葉建源，搞到葉劉都窒咗一窒。
堅稱冇超出討論範圍 全場大笑
葉劉冇嬲到，仲幫口話范國威係叫「葉議員」，佢都係葉議員，無問題嘅。唔知阿Ann係太掛住葉建源，定係分咗心，冇聽清楚呢？
下午嘅政制事務委員會上，阿Ann又引爆笑彈。話說佢發言關注立法會選舉門檻同埋點票時間問題，但被委員會主席張國鈞話佢嘅發言超出討論範圍，佢即刻發火，話要投訴張，仲解釋話自己對尋日嘅議題冇興趣，所以先講自己關注嘅事項，堅稱冇超出範圍喎。聽到阿Ann呢番言論，唔少喺會議廳內嘅議員哈哈大笑，緊接發言嘅議員仲一度笑到講唔到嘢，話阿Ann好有趣、好可愛添！