政情：劈價一球賣樓 梁美芬仲賺347萬
樓價自舊年底開始尋底，社會普遍唔睇好今年樓市。無獨有偶，本來持有五個物業嘅立法會議員梁美芬（Priscilla），喺上個月劈價「一球」，即一百萬元賣出一個黃埔花園嘅單位！唔通連佢都睇唔好個市，急住走貨？Priscilla卻任性地話：「我鍾意賣就賣！」佢梗係鍾意喇，事關佢賣呢層樓帳面計仲賺咗三百四十七萬元，少賺一百萬元濕濕碎喇！
根據立法會一六年嘅申報，Priscilla擁有四個住宅物業，九龍西有兩個，其中一個物業透過公司持有，另外喺新界西區同美國各有一個物業。至一七年九月，佢又再喺九龍西買入一個辦公室物業，都係透過公司持有，前後合共五個物業。
直至今年一月四日，佢又向立法會作出申報，當中已經唔見咗美國嘅物業嘞，跟住再喺一月十四日，佢申報九龍西只係擁有一個由公司持有嘅住宅物業，好明顯放咗一個。據了解，Priscilla舊年十一月放售紅磡黃埔花園中層單位，實用面積三百八十九平方呎，叫價七百三十萬元，但一直無人吼，上月先減至六百七十萬元，最終劈價一百萬元，以六百三十萬元賣出單位。
「我鍾意賣就賣」
問到點解急住走貨？Priscilla笑住否認，話只係想令投資更為多元化，佢舊年亦賣咗美國嘅物業，形容係好正常買賣，唔使覺得太奇怪。但劈咗一百萬港元喎，係咪唔睇好個市？佢就話出售價同心目中價位差唔多，「我鍾意賣就賣」，無乜話點解劈咁多。照咁講，初初叫價七百三十萬元，咪係吊高嚟賣？
一下子袋咗幾百萬元，啲錢會轉向投資乜嘢？佢就話覺得好多年輕人搞初創好辛苦，或者考慮吓投資初創企業，或者喺其他地區買物業都唔定，總之佢向投資委託人唯一要求「唔買山旮旯嘢！」
Priscilla冇多講究竟個單位有冇賺。不過，根據土地註冊處資料，早喺二○一○年，佢以私人名義購入呢個單位，當時成交價約二百八十三萬元，依家以六百三十萬元賣出，帳面已經賺咗一點二倍，即係三百四十七萬元，可謂賺到笑喇！如果依家唔賣，話唔定等多幾個月，樓價繼續跌，又唔見幾十萬呢？