中環出更：肥彭陰魂不散 稱與中國合作有風險
香港都回歸咗二十一年，但係末代港督彭定康（肥彭）仍然陰魂不散，周不時對香港事務指指點點，抽水搞搞震。最近肥彭仲連中、英兩國嘅合作都走出嚟指手畫腳、說三道四一番，聲稱同中國合作，會為英國帶嚟安全風險云云，總之誓要添煩添亂喇！
指中國軟手段向西方學術界施壓
肥彭現時係牛津大學校監，牛津大學日前宣布以安全理由，不再接受中國科技巨頭華為集團及其相關公司嘅捐款，以及暫停雙方嘅合作項目。
肥彭近日出席英國國會外交事務委員會聽證會時話，中國利用撥款資助或合作研究等軟性手段，向西方學術界同學生施壓，佢對呢種做法不感驚訝。不過就警告話，涉及人文以及科學嘅學術研究，同中國合作會構成安全風險，例如由中國政府資助嘅孔子學院已經引起咗問題，告誡各大學嘅高層有咩疑慮，就同英國政府傾吓先喎。
卓妮