政情：今日你上鏡：受新聞啟發設基金 黃永光諗足五年

香港創新基金董事黃永光成立基金，以支援基層學生學識創新科技知識，原來佢成立基金，全因為睇到一則新聞，令到佢受到啟發，究竟係乜嘢新聞呢？黃話，佢喺六、七年前收睇美國某電視台一則有關白宮舉行科學展覽嘅新聞，原來為咗鼓勵未來一代發揮創意，美國每年都會安排一批喺創意發明上有優異表現嘅中、小學生，帶同其創意成果到白宮展出，仲會得到總統接見。黃認為好值得欣賞同倣效，於是就花咗五年時間構思並成立咗呢個基金，支援多個同創科相關嘅課程，免費為基層家庭學生教授編寫手機應用程式、創作電路藝術作品等技巧，而表現傑出嘅學生仲可以喺商場展出佢哋嘅創意成果添。