政情：沈運華斥泛民議題太老餅
民主派喺立法會九龍西兩場補選中大敗，過往民主派同建制派得票嘅「六四黃金比」已被打破。本身為民主黨中委嘅黃大仙區議員沈運華尋日就喺網台節目度，批評泛民嘅議題太「老餅」，難以吸引年輕人。民主派被人話食老本都唔係第一次，有冇反省檢討相信都有目共睹。
難吸引「○○後」支持
沈運華喺節目話，泛民喺補選中連敗兩場，其中一個原因係泛民嘅議題太「老餅」，難以吸引年輕人，而所謂「老餅」議題就包括「六四」、「內地異見人士」等。佢認為呢啲議題雖然都重要，但對年輕人嚟講就係「唔關佢事」，佢自己都係「八十後」，都叫掹車邊接觸過呢啲事件，但對於「○○後」而言就相當陌生，亦唔會感興趣，相反做貼地嘅民生工作如關注房屋問題等，就會得到多啲支持。
佢仲話，泛民依家唔止得唔到六成選民支持，就連政圈當中都愈來愈多分歧，就好似該黨早前爆出嘅大規模退黨事件。但佢就話泛民需要分裂，因為咁先可以喺立法會換屆時吸納唔同選民嘅支持喎。