政情：收禮物清單 譚志源嘆聖誕商業味濃

屋企狗狗都有份

Raymond話佢年幼時嘅聖誕一定有寒流襲港，但佢都會出街聽人報佳音，雖然街上人流唔及現時暢旺，但就相當有氣氛。反觀現時嘅聖誕節商業味濃，鼓勵消費，好似佢自己咁，就一早收到清單，要為家人預備禮物。不過佢呢位聖誕老人都係遺傳自爸爸，因為Raymond細個時，都會將自己最大對嘅波襪掛喺床頭等收禮物，而佢爸爸知佢鍾意模型，都會為佢送上心頭好。

依家輪到Raymond負責送禮，佢嘅女兒亦都維持年年擺聖誕襪嘅習慣，佢仲笑住話女兒大咗都繼續要挾爸爸。不過，佢都話囡囡好「均真」，會為每個家庭成員準備聖誕襪，連屋企隻狗都唔會少，難怪Raymond會為搜羅聖誕禮物而頭痛啦。