政情：籌款晚會表演魔術 蔣麗芸呻忙驚失手
各個政黨都會舉辦籌款晚會，立法會議員蔣麗芸（Ann）所屬嘅建制派政黨亦即將搞籌款晚宴，而佢就負責表演魔術，但就大呻呢排有大批工作，驚無時間練習，最後失手人前獻醜。
籌款晚宴今晚舉行，由於尋日係立法會九龍西議席補選，建制派要動員人手助選，據聞為免大家太操勞，今晚上台嘅議員服裝從簡，男士只需着西裝，女士更自行決定，唔使刻意扮嘢。
「啲嘢堆埋一次過嚟」
本身係九龍西直選議員嘅阿Ann幫手助選實走唔甩，又大呻最近接連展開佔中案同七警上訴案等，「啲嘢堆埋一次過嚟」，擔心無時間練習。至於今晚表演乜嘢魔術？佢就話要保留神秘感唔講得喎。