中環出更：環保政策一鑊泡 黃錦星遭阿牛狙擊
政府早前硬推俗稱「四電一腦」嘅廢電器電子產品生產者責任計劃因為回收亂晒龍，搞到廢電器堆滿街，回收商又因吃不消大量回收廢電器而逼爆廠，近排政府又再建議實施垃圾徵費，各界都質疑建議成效，甚至擔心措施令垃圾被掉晒出街，最終垃圾圍城。環保政策做到一鑊泡，環境局局長黃錦星當然難逃責任，佢日前更被社民連曾健成（阿牛）「狙擊」添！
街頭遇見 提減廢節能
話說早前為反對「明日大嶼」填海計劃而打扮成「海豚」嘅阿牛，日前喺金鐘遇見黃錦星，初次見黃嘅佢，即刻衝前當面向黃「連珠炮發」提出多項環保訴求，包括建議路邊垃圾桶唔再用垃圾袋，直接將垃圾桶中嘅垃圾倒走，以慳番膠袋；同埋將街燈減半，以節省能源；增加電動車叉電裝置，鼓勵市民用電動車等。
阿牛又話，平時好難約見政府官員，今次真係相請不如偶遇，但都並非佢首次遇到官員。佢自爆有次同太太返教會時喺禮頓道遇到時任發展局局長陳茂波及其太太，陳開頭一臉凝重，好似好擔心，當佢行近同陳講「早晨」，陳先鬆一口氣。佢笑稱自己唔會食人，又唔會出手，都係得把口去爭取訴求，覺得啲官見到佢唔使咁驚嘅。
卓妮