政情：梁美芬舌戰慢必：戀愛唔一定要結婚

由首名「出櫃」立法會議員陳志全（慢必）提出嘅「研究制定讓同志締結伴侶關係的政策」議案喺前日嘅立法會大會引起激辯，雖然總算告一段落，但佢同反對同志婚姻嘅議員梁美芬嘅舌戰就仲未停。而梁仲話︰「人戀愛唔一定要結婚」。呢句說話由已婚嘅梁講出嚟真係耐人尋味。如戀愛唔一定要結婚，梁又點解要結婚呢？

話說梁美芬同慢必尋日出席電台節目，再次就同志議題交鋒。梁強調自己支持同志平權，但認為唔應該動搖現有婚姻制度，仲話︰「其實人戀愛唔一定要結婚」，又話有人一夫多妻或婚外情包二奶，都係超出婚姻制度嘅愛情關係，同志相愛都可以係呢種，只需要「擴闊關係定義」就得。

梁美芬咁講慢必當然唔收貨。慢必就反駁話，性小眾團體唔係要打倒一夫一妻制，但有啲權益只能夠透過婚姻關係去取得，例如輪候公屋同合併報稅等，反問︰「唔通兩個同性朋友住埋一齊就可以合併報稅咩？」睇嚟佢哋兩個日後就同志婚姻呢個議題都有排拗喇。