中環出更：救命緊要過救窮 梁榮燊瞓身勸人捐血
近年市民捐血嘅意欲低落，導致血庫不時出現「血荒」。早前喺一個活動上卓妮見到冬日陽光慈善基金會主席梁榮燊，基金會嘅主要工作係協助紅十字會呼籲市民定期捐血。梁就話，貧窮人士餓一、兩餐唔會餓死，但係需要輸血嘅病人如果冇血就可能冇命，所以值得幫手勸大家捐血做善事，聽落都幾有道理喎。
當日係第三屆「香港青年服務領袖獎」獎勵計劃頒獎典禮，梁榮燊同獎勵計劃聯合創辦人林月萍係多年老友，所以都捐咗一張大支票。梁笑稱，基金會成立初期係以勸人捐血為主，最近開始做埋其他善事。講開捐血，佢話香港每日需要一千一百包血，但依家啲人作息唔正常、體能變差，又鍾意去旅行，要隔一段時間先可以捐血，加上觀念有偏差，所以血庫經常唔夠血，認為如果市民可恒常捐血就最好喇。
黎穎瑜捐出第一包血
民政事務局局長政治助理黎穎瑜早排都捐出人生第一包血，佢講起都仲好雀躍。佢話，當時感覺狀態唔錯，捐完之後都忍唔住舉個V字手勢，覺得好開心。卓妮見佢同保安局局長政治助理劉富生入場時同其中一位得獎者好好傾，細心一睇，原來呢位得獎者係立法會議員田北辰助理何君悌，何着上制服同平時打扮好唔同。問到何平時工作咁忙，點樣偷時間做服務？何就笑笑口話，通常都係周六、日出去做服務，所以多數冇問題喎。
香港華僑華人總會青委會主席梁煒茵都現身支持獎勵計劃副主席陳志豪。佢哋咁啱分別籌辦鼓勵小朋友出街體驗真切生活嘅親子活動，例如去街市買餸。梁煒茵笑稱，佢四歲嘅囡囡見到綠色西瓜就問「西瓜唔係紅色嘅咩？」原來佢囡囡見慣切咗嘅西瓜，真係搞笑。
卓妮