嗱嗱嗱，澳門政府又派錢嘞，永久居民人人一萬，非永久居民都有六千，咁咪皆大歡喜囉，點似得港府派糖都派得縮骨過人、甩漏過人，搞到唔係要補漏拾遺，就係怨聲載道吖。
講起港府派糖啲烏龍嘢，三日三夜都數唔完，淨係舊年施政報告提出嘅「公共交通費用補貼計劃」咋，唔止每月補貼上限得嗰三舊水咁大把，仲要限制多多，而且拖到出年元旦先至實施，蚊都瞓、蛇都死。好似每日逾廿三萬人次乘搭嘅邨巴吖，最初不被納入計劃之內，結果被輿論狂轟，港府先至死死哋氣補鑊，殊不知補鑊都補得衰過人，乘客到頭來都係難以受惠。
事關運輸署規定邨巴、員工巴士、紅van及街渡必須「適度管理風險，減少濫用情況」，要求營辦商必須喺車上安裝八達通收費系統，登記路線資料，兼且承諾定期提交營運資料及審計報告。即係咁，公帑必須用得其所，運輸署嘅要求無可厚非，但衰在堅離地囉。諗都諗到喇，交補計劃「錢跟人走」，受惠嘅係乘客而非營辦商，反而營辦商既要支付安裝八達通機嘅費用，又要請專人寫報告同核數，未見官先打三十大板，冇着數之餘，仲增加營運成本添，請問有乜誘因令佢哋參加計劃呢？
有邨巴營辦商就講到明，如果運輸署唔簡化申請程序，真係咪使旨意佢哋參與。同樣情況紅van一樣出現，由於全港一千多架紅van只有兩成設有八達通機，業界唔想增加額外成本，預料大部分路線都唔會參加計劃。果不其然，運輸署透露現正處理三十宗邨巴、員工巴士、紅van及街渡嘅申請，涉及七十多條路線，佔有關服務一成至一成半咁大把，咁搞法，有補貼即係冇補貼，市民得物無所用，想唔見財化水都幾難咯。
講到尾，呢啲咪就係港產官僚閉門造車惹嘅禍囉。官僚倉卒推出計劃，以為可以博取掌聲，點知未經深思熟慮，搞到唔湯唔水。話時話，交補計劃罵聲不絕並唔係個別例子，好似今年財政預算案推出嘅文憑試免考試費安排、向漏網市民派發四千蚊嘅補漏安排等等，莫不搞到天怒人怨，民怨沸騰，結果補完又補，愈補愈漏，問你服未。
真係諗極唔明，人哋話有錢好辦事，港府庫房滿瀉，偏偏有錢都辦唔到事，仲要化神奇為腐朽，除咗港產官僚人頭豬腦之外，都諗唔到第二個原因咯。點都好，邨巴及紅van每日乘搭人次閒閒哋超過五十萬，港府唔諗辦法簡化申請程序，補番隻鑊，因住激發五十萬人上街聲討吖！