政情：山竹大破壞 年度漢字「風」登榜
早前颱風「山竹」襲港，造成巨大破壞，周街同山頭啲樹塌晒，西貢變艇墳場，事隔逾兩個月，政府清極都清唔晒，相信市民都唔會忘記呢個巨風。
市民投票 下月底公布結果
二○一八年即將結束，有政黨舉辦「年度漢字評選」候選比賽，提供十個漢字畀市民投票選出一個具代表性嘅字，以表達今年世態同生活狀況，反映市民心聲，而「風」字就上咗榜嘞！
點解揀個「風」字，咪就係因為山竹襲港造成破壞，更發出十號颱風信號歷時十小時囉！上榜嘅字仲包括順、民、判、樓、守、通、禁、公、地，市民由尋日起至十二月十四日投票，結果會喺十二月二十八日公布。