政情：陳振英要求點人數 建制誤會泛民拉布
過去泛民議員會以點算法定人數、提出中止待續議案等方式喺立法會拉布。但喺尋日嘅立法會大會上，金融界議員陳振英就忽然提出點人數。唔知係咪過去泛民點得太多，所以唔少議員一聽到點人數，都好理所當然以為係泛民議員要求，搞到有啲建制派喺會議廳門外埋怨。
當時立法會討論緊由兩名民主派議員提出，要求引用《立法會（權力及特權）條例》成立專責委員會調查事件，喺官員發言後，原本應該係由提出動議嘅議員發言，然後就進入投票階段。就喺嗰刻，陳振英忽然舉手要求點算法定人數。
解畫話見唔夠人喺會議廳
喺點人數期間，唔少建制派議員即刻返入會議廳，但有部分議員有微言。民建聯梁志祥就講咗句「差嗰少少都要打鐘」、身兼行政會議成員嘅林健鋒同獨立謝偉俊就打算拖到最後一分鐘先入去、而民建聯柯創盛仲直頭鬧民主派拉布添！不過，當大家發現原來係陳振英嗌點人數都嚇親，其中柯創盛仲質疑「點解會係佢點(口架)？」
今次係陳振英處男下海點人數，佢喺會後解釋，話建制派班長廖長江有叫佢幫手睇住，而當時又見到建制派唔夠人，所以先要求點人數。