中環出更：畀區諾軒叫BB 葉劉淑儀唔介意
話說立法會尋日審議財經事務及庫務局動議嘅擬議決議案，以授權政府發行綠色債券，議員區諾軒發言話感謝議員葉劉淑儀同幾位前議員，喺○九年審議政府推動債券基金時提出好有智慧嘅討論，講講吓又引述咗以前嘅發言內容，仲爆肚話係「葉劉淑儀BB」講o架，令唔少人都聽到呆一呆。
笑稱自己係長者
事後問番葉劉對被稱為BB有乜嘢感受？佢就反問區諾軒：「你係咪玩我o架？我長者嚟o架喎！」又話會畀網民笑，區諾軒即刻耍手擰頭，但係葉劉笑話唔介意，仲同區補課講香港歷史添！
葉劉話區諾軒喺第二次發言時唔應該以殖民地政府做類比，當時港府無錢係無人會可憐，所以啲財政司都係守財奴，但近年政府使錢就無咁審慎，慨嘆要使錢好快就使晒，擔心明年少咗賣地、貿易戰等都會影響收入。
不論BB定長者，葉劉從政多年，點都有經驗過全議會最年輕嘅議員區諾軒，大家得閒論政交換意見咪幾好囉！
卓妮