中環出更：去佛寺搞創科？莊學山：洗滌心靈
近年個個都話香港要發展創科、人工智能、智慧城市，所以今年第十屆國際潮青聯誼年會都會按呢個趨勢搞活動，將創科論壇定為其中一個主打，但同時佢哋竟然仲有一個活動叫「洗滌之旅」，一齊去到訪佛寺，洗滌心靈咁話。
搞創科都要去埋佛寺？香港中華總商會永遠榮譽會長莊學山解釋，科技固然重要，但今時今日個個食飯都拎住手機，搞到連食緊乜、對面坐咗邊個都唔知，而且生活愈嚟愈忙，壓力愈嚟愈大，所以就決定要到訪佛寺，到時個個都要沒收電話，一齊學吓「靜」落嚟！
佢話唔係第一次搞到訪佛寺嘅活動，以前試過帶啲學生去住幾日，通常活動首日要沒收電話嘅時候，個個學生都好唔慣，大叫世界末日，但其實只要過兩三日，佢哋習慣咗之後就會對冇電話嘅日子都會別有一番感受，學識「靜」落嚟。不過，佢話呢啲感受只係局限喺寺內嘅日子，最後學生拎番電話嘅時候，都係會不停咁撳，上網分享呢幾日冇電話嘅感受喎。
張俊勇瞓覺唔接電話
國際潮青聯誼年會大會主席張俊勇都話冇試過唔用電話一日，話今時今日冇電話會斷晒聯絡，但佢強調佢瞓覺時係唔會接電話，確保自己有好嘅休息，最多第二朝先睇番啲訊息。佢仲話依家訊息咁大量，每日都會睇到好多唔同資訊，所以就更加要發展創科，例如區塊鏈等，幫助篩選訊息，咁就唔使乜訊息都睇喇！
轉頭見到香港天津工商專業婦女委員會副主席林倩如、香港潮屬社團總會主席陳幼南同醫院管理局成員劉文文。劉文文話瞓覺冇熄電話嘅習慣，因為佢覺得已經冇乜大分別，最終都係要睇番啲訊息，但佢覺得依賴手機的確係有啲缺點，例如依家嘅小朋友已經唔多識寫字，只係識打字，英文嘅串字能力又差咗，最重要係對雙眼傷害大，所以雖然好難完全唔用手機，但可以嘅話都係唔好太依賴嘞！
卓妮