政情：醫院認證擬重推 李國麟憂前線爆煲

促陳肇始勒停準備工作

立法會衞生服務界議員李國麟關注新計劃詳情，及當局點樣確保唔會加重醫護人員工作，食物及衞生局局長陳肇始就話醫管局喺明年初、流感高峰期過後，將舉行諮詢會同以聚焦小組方式，收集各持份者同前線人員意見，以構思計劃詳情，強調喺未檢討前，唔會以考核方式推動計劃，以減少文書工作。

李國麟話，據佢了解，部分醫院得悉有關計劃後，已推行臨床研究準備工作，但前線人員工作量高，要求陳肇始勒令醫管局叫停一切無謂嘅準備工作，而醫學界議員陳沛然亦話喺過去十年有唔少醫護人員被調往處理行政同文書工作，又舉例指一間中型醫院已需花近二百人處理認證相關工作，指出員工認為計劃是勞民傷財，現時叫停計劃更將醫護員過往努力付諸流水。

一句到尾，公立醫院醫護人手短缺，十個煲五個蓋，仲要處理咁多文書工作嘅話，遲早又爆煲。