開講有話：「烏鴉唔好笑豬黑。」好似早幾年有自由行小童喺旺角隨街便溺，引來唔少香港人側目，大鬧冇家教、冇公德。冇錯，港人的確好少可隨街「大鳴大放」，只不過部分缺德嘅港人只係轉咗去公眾泳池暢便咁解，講到冇公德心咯喎，都係彼此彼此嘅啫。
呢，有調查發現康文署轄下公眾泳池衞生程度差到冇朋友，舊年就有二百幾宗糞便個案，比前年上升咗三成有多，位於將軍澳、屯門嘅泳池，舊年就各有超過二十宗，平均一個月兩宗，游泳池應該改名叫「游便池」就差唔多。咁都有啲嘢係「進步」咗嘅，好似發現嘔吐物嘅畸士咁吖，就由前年二百六十六宗，減至舊年嘅二百三十七宗，少咗二十九宗咁大把呀。游水本來都係為咗強身健體，但泳池衞生惡劣成咁，市民莫講話暢泳，諗一諗都惡心。
其實公眾泳池設施齊全，要解決生理召喚，只要上番水行幾步路就到，比起人生路不熟嘅自由行旅客，想話喺市區搵個洗手間，可以話不知方便幾多倍。但係泳池都係變咗缺德者嘅方便池，係咪更加缺德都唔使問喇。
講真，喺泳池排泄嘅好多時都係小朋友，作為家長更加有責任教育下一代，起碼落水前要沖身清潔，不過好多人連呢啲基本嘢都忽略，一身臭汗老泥直接跳落水，泳池想唔污糟都難啦。
香港人成日自命不凡，又自詡係國際大城市，又不屑同佢哋眼中唔文明嘅內地人相提並論，近日仲有調查話有四成半年輕人唔認自己係中國人添。但公眾泳池變排泄池，香港人就一嘢露晒底喇，中國人有嘅「髒、亂、吵」毛病，香港人唔止一樣有，甚至更加離譜添，香港人想唔認祖歸宗都唔得啦。
講到港人嘅唔文明、唔注重衞生行為，其實早就醜出香港，年前就先後有香港女子喺台灣做租霸，唔係堵塞馬桶，就係將貓屍、垃圾隨處丟，搞到烏煙瘴氣，有人甚至因此被永久禁止入境台灣添。至於港人喺世界各地嘅失儀行為，雖然唔似得內地人咁有官媒發出「文明旅客」指引，但都絕對唔在少數，只係港人慣性雙重標準，對內地人嘅不文明行為就無限放大，對泳池排泄物問題就「臭屎密冚」，甚至會連提都冇乜人提啫。
一粒沙子看世界，從公眾泳池嘅衞生情況之惡劣，就可以見到港人嘅自私同缺德，當呢種心態投射到日常生活，小則喺車廂中除鞋捽腳、霸住成排櫈「攤屍」，罔顧其他人感受，大則違泊車輛、亂丟垃圾、癱瘓交通，香港墮落就係咁解。