探射燈：六日考到牌 門檻過低害死人
「專工專責」去年四月實施，規定地盤內的技術工作須由該註冊工種的技術工人進行，惟「潛水員（建造工作）」的註冊條件僅要求持有休閒潛水牌照，包括由美國國家潛水教練協會（NAUI）發出的晉級水肺潛水員級別。市面潛水課程資料顯示，考取NAUI的基本及晉級牌照，最快僅需共六日時間。有潛水教練直言，商業潛水與休閒潛水的要求差天共地，入行門檻過低隨時害死工人。
「有名你叫休閒潛水，就係教你用潛水裝備，等你可以喺水底自由呼吸，欣賞吓環境，但落水做工程唔係淨係呼吸o架嘛！」香港潛水訓練學院前院長李健光指出，水底工程涵蓋勘探、燒焊、搬移重物及興建隧道等技術性工作，部分工序如打撈更涉及複雜科學計算，當中需運用的裝備、技能、安全措施及應急程序均與休閒潛水有莫大分別。「單係講環境，去東南亞潛水睇嘢，同潛落坑渠做工程，能見度差十倍都唔止啦！」
倡以工程紀錄作聘請評估
香港技術潛水總會主席李克強指牌照與經驗並非必然掛鈎，下潛次數及潛水員特殊專長反而更重要。「喺大海做工程，同喺有蓋空間或洞穴做，技術需要已經唔同。」李建議僱主及主管應參考潛水員以往參與大小工程的紀錄，作為聘請或分工的評估基礎，避免「豬一樣的隊友」危及安全。