政情：選村代表唔簽確認書 朱凱廸預咗被DQ
向來關注新界鄉郊發展嘅立法會議員朱凱廸同南區區議員司馬文喺年中組成「綠色鄉村約章」，尋日宣布連同其他四人將參選明年初嘅鄉郊代表選舉，但對於選舉事務處將喺有關選舉加入確認書，以確保參選人擁護《基本法》同特區政府，朱凱廸同司馬文都話唔會簽，朱話喺一六年參選立法會時都冇簽，會維持自己嘅作風，一樣唔會簽。
六人分別係參選元朗元崗新村嘅朱凱廸、西貢檳榔鄉嘅司馬文、上水鄉嘅廖偉濂、西貢北港嘅何潔儀、西貢海下嘅David Newbery、西貢浪徑嘅Herve Bouvresse，當中廖係選原居民代表，其餘五人都係選居民代表。而朱、司馬、廖、David Newbery都話唔會簽確認書，何潔儀就話考慮中。
村民唔撐 朱當「鯰魚效應」
唔簽確認書擔唔擔心被取消資格（DQ），朱話早前人大釋法係針對宣誓，應與報名參選無關，一旦被DQ就可能係佢最後一次喺香港參加公開嘅選舉，佢笑指會感光榮同自豪，認為自己為香港民主之路、鄉村環境改革上付出嘅努力開花結果。至於村民支唔支持佢參選，佢就引用十八鄉鄉事委員會主席梁福元曾話佢參選會引起「鯰魚效應」，激勵其他村民勤力番啲，佢認為算係支持佢，事後亦都有私訊梁多謝佢咁話。
現為香港眾志常委嘅廖偉濂係另一個DQ嘅高危人士，但佢話今次選村長唔會喺政治聯繫上填上香港眾志。咁係咪可以平安入閘就唔知喇！