政情：消防處：任何仁唔會被消失 或安排落區
消防處近日以「任何仁」鼓勵市民喺緊急情況下進行急救，由真人扮演嘅「任何仁」以一身藍色緊身衣嘅破格造型，連日來成為網民嘅嘲諷對象，甚至有網民嘲為AV（成人影片）男角色。日前有傳「任何仁」被消防處高層認為有違正面英雄形象，恐怕將「被消失」。消防處社區應急準備課嘅高級消防區長黃宏亮尋日喺一電台節目上話，「任何仁」唔會消失，仲話唔排除會落區宣傳，或喺「短時間內出現」。
黃宏亮話「任何仁」日後會繼續以真人版出現，被問及高層有否怨言，或認為「任何仁」貶低消防員形象，佢回應話管理層都畀咗好大創作空間，宣傳嘅最終目的係希望意念可深入民心，認為「任何仁」係成功例子，又話自己「坐喺度食早餐都聽到任何仁」。對於有網民指「任何仁」同日本AV男角色造型好相似，佢話意見一定有好有壞，希望宣傳能引起社會關注。
專登搵有肚腩嘅員工演出
佢又話「任何仁」一直由社區應急準備課嘅員工扮演，第一條宣傳片更刻意搵有「肚腩」嘅員工演出，想畀社會知道，任何仁即係你同我。佢又補充，大家若翻查消防處「擊活人心課程」嘅宣傳單張，就會見到「任何仁」嘅第一個創作版本，係一個只有嘴巴嘅藍色公仔。