中環出更：梁繼昌操靚身形 望渡海泳騷肌﹖
一年一度嘅維港渡海泳已經喺上個月圓滿舉行，年年都捧場落水參加嘅立法會會計界議員梁繼昌（Kenneth）今次都唔例外。佢尋日透露，為答謝大家參加維港渡海泳，負責籌辦維港渡海泳嘅香港業餘游泳總會就宴請佢同其他參加嘅運動員及政府官員。佢又話希望可以操fit啲身形，唔通佢想下年再參加渡海泳時可以「騷肌」﹖
讚馮海容泳衣上陣好難得
鍾意游水嘅Kenneth年年都參加維港渡海泳，可以話係立法會中參加渡海泳嘅中堅分子，而佢亦都肩負起游說議員同政府官員參加嘅責任。佢尋日就呻話叫大家參加渡海泳一啲都唔容易，但好彩都有議員同官員支持。而今次商務及經濟發展局政治助理馮海容（Elizabeth）都有上陣，Kenneth直言，Elizabeth作為女仔，肯以泳衣示人真係好難得。
講起泳衣，Kenneth次次參加渡海泳都會穿着較為密實嘅潛水泳衣，唔知佢會唔會突破自己嘅尺度呢？佢就摸一摸自己個肚話要再操 fit 啲，等出年參加渡海泳時可以唔使再着潛水衣，似乎想行「性感」路線，如果係咁，就真係要拭目以待喇！
卓妮