中環出更：睇中智能輪椅錢大康讚似跑車咁型

錢大康話自己係工程師，所以特別留意電動輪椅，而見到現場咁多設計出色的未來產品都係日本設計，佢感慨話，香港始終以地產及金融為主，讀工程嘅人才固然有，但係更加需要有人文關懷教育，先至可以設計一啲人性化嘅產品。

其實呢個係港九電器商聯會主席蒙德揚旗下嘅信興集團喺會展舉辦未來生活展，慶祝集團成立六十五周年同日本電器品牌成立一百周年，現場當然少不了展示集團代理的經典電視機、電飯煲等懷舊家電，亦有好多未來智能家居用品。

張翔最想未來唔使自己煮飯

現場仲見到香港大學校長張翔試緊按摩椅，佢成個人瞓平，個樣好享受咁。佢都係一個好有創意嘅發明家，佢設計嘅隱形衣令人津津樂道，唔知佢幻想中嘅未來世界，最想要乜嘢呢？佢就笑笑口話，最好有得喺公司按一按智能電話，返到屋企就有熱辣辣嘅三菜一湯晚餐食，唔使自己煮。如果有呢一日，真係師奶之福啦！

國貨公司後人余鵬春都有到場，佢見到現場展示嘅舊家電，不期然諗起內地改革開放初期，曾經同蒙家合作做「香港買單、內地提貨」生意，入口電視機、雪櫃等四大件返內地的情景。

張翔（左）都應蒙德揚（中）邀請去體驗未來生活，右為蒙淑美。

余鵬春讚呢部可儲存冷凍食物的儲物櫃，好適合暫存網購食物。

卓妮見現場有一位靚女跟喺蒙德揚身邊，原來係佢大女蒙淑美，佢已返公司幫手，睇嚟可以慢慢分攤爸爸的辛勞喇！

卓妮