由「香港之光」淪為「香港之恥」嘅國泰航空，雖然一早同全球最佳航空公司嘅寶座講拜拜，但就有樣嘢始終領先同業，呢樣嘢就係瘋狂超賣機票嘞，話國泰欺客無底線就係咁解。
呢，有國泰員工近日喺社交平台踢爆國泰大幅超賣近兩成機位，搞到四十幾個畀足錢嘅乘客上唔到飛機，被當成「人球」咁踢，都咪話唔淒涼。面對指控，國泰例牌巧言令色，死口唔認有超賣機位，死撐只係航機調動，又話「大機換細機」喎，所以搞到有乘客冇位坐，仲懶叻咁話已經安排咗乘客改乘其他航班去目的地。對於乘客行程被打亂晒，國泰只係講聲抱歉就算數，仲有冇離譜啲呀。
講真，航空公司超賣機位並唔罕見，不過行內普遍只會超賣幾張，好似國泰咁狼死，超賣近兩成機位，仲要畀人踢爆之後有膽做冇膽認，就真係沒有最無良，只有更無良。喂，你估事後安排其他班機大晒呀！超賣令乘客失晒預算，國泰求其畀啲餐券、賠幾百蚊，又或者安排貴賓室休息就想打發人走，事後仲要輕描淡寫，唔通真係無恥者無敵？公道自在人心，莫講話乘客鬧爆，連自己員工都睇唔過眼，化身「深喉」做洩密者，親身踢爆公司劣行，話國泰唔係眾叛親離都唔得喇。
冇辦法喇，國泰管理無能又錯判大勢，前幾年燃油對沖輸錢輸成億億聲，搞到業績年年見紅，結果黑狗得食，白狗當災，公司唔係搵管理層開刀，而係懲罰基層員工同顧客，一方面不斷裁員，一方面不斷降低服務質素，希望慳得一蚊得一蚊，超賣機票只係劣行嘅冰山一角啫。好似民航處早排宣布航空公司由下月起，可以自行決定係咪徵收燃油附加費，國泰第一時間撲出嚟話要收，長程機來回盛惠一千三百大元，短程都要三舊水，直頭飛擒大咬，當乘客係提款機咁撳。大家睇到啦，民航處所謂開放收費，鼓勵競爭，根本就係開放無恥，鼓勵無良。民航處與國泰打龍通，合謀打劫乘客，真係吟詩都吟唔甩吖。
咁都未算吖，之前國泰陸續改裝機艙，增加座位，乘客慘變沙甸魚之餘，空服員工作量亦因此大增。至於國泰航班各種意外層出不窮，唔係廁所壞就係艙門壞；唔係機件空中脫落，就係九霄冒煙，乘客飽食驚風散，有人預言國泰趕客不止，遲早有一日關門執笠，絕對唔係杞人憂天o架。
講到尾，禍福無門，唯人自招，國泰呢間百年老店，近年不思進取，自毀招牌，搞到國際排名江河日下，咪係香港競爭力跌跌不休嘅縮影囉！