林鄭月娥的「明日大嶼」計劃劣評如潮，填海造島引起社會有識之士全面圍插，說是辣㷫全港市民也不為過，其負評恐怕林鄭事前也預料不到，佢甚至以為自己登高望遠，胸懷大志，為港人燃點的又豈止是希望咁簡單，直情係人間桃花源，十四年後，人人有屋住，家家樂融融！豈知社會大眾毫不領情，左中右一致鬧爆。
「明日大嶼」會否淪為「明日黃花」？以林鄭之好勝、剛愎自用，佢會否堅持「迎難而上」？反正風水佬呃你十年八年，林鄭話二○三二年就有人工島之公屋可入伙啦，喂，係唔係呃多你三、四年都唔得先？香港人，你們太小器了，只會批評一個咁有承擔、敢於大幅填海嘅特首好高騖遠、燃燒儲備、捨近求遠、獻媚中共……
老朽相信以「好打得」、「執行力高」見稱的林鄭，心中必然意難平：以前說甚麼「做人新抱真艱難」，計我話，做一個望得遠、肯規劃一個比「玫瑰園」更宏觀的世外桃源給大家的特首更艱難！可惜啊，大家只看到玫瑰的刺，而看不到怡然自樂的人工島！都說香港人太現實、太追求近利，在官場打滾三十多年的我，如今信了！
寫吓寫吓，老朽忽然對林鄭為「香港明天」不惜得罪全地球人的勇氣鼓掌，佢唔單止想「做好呢份工」，連夫君嘅怨言「今後更難得見你一面」都可以「骨一聲」吞咗佢，比起大禹治水過門而不入的精神，不是有過之而無不及嗎？如此「夙夜憂勤」的特首，只為改善市民的居住問題，真正想「快快做、大膽做」，竟淪落到萬箭穿心，老天爺，你為何不長眼？老朽想起歌手齊秦有首讚美北方之狼的歌，其中幾句，就獻給目光遠大的林鄭：「漫漫的黃沙掠過，我只有咬着冷冷的牙，報以兩聲長嘯。不為別的，只為那傳說中美麗的草原。」天假我年，「明日大嶼」，十四年後見！