政情：捲非禮案冇被控 項明生甩難
旅遊達人項明生（James）去年七月捲入一宗懷疑非禮案，經過年幾嘅調查之後，James尋日發聲明話，近日獲警方通知，呢宗懷疑非禮案調查已經結束，無人被控。佢對事件告一段落覺得好欣慰，又話感謝警方還佢清白。
感謝朋友書迷信任
James喺聲明中都感謝朋友及書迷，一直對佢好支持同埋信任。文末佢仲寫下「風急雨暴終無常，恰似飛鴻踏雪泥。願我遠離，一切敵意與危險。願一切眾生，都遠離敵意與危險」。該宗懷疑非禮案發生於去年七月，當時一名廿二歲男子往北角英皇道James嘅辦公室見工，其後報警聲稱遭人非禮，事發後警方一度將James帶返北角警署調查。