政情：蔣麗芸避暑 留守屋企做農夫
好多立法會議員趁暑假期間去旅行，但議員蔣麗芸（Ann）就邊度都冇去，留喺屋企種菜，而且仲有唔少種類，包括通菜、台灣A菜、豆苗、番茄及火箭菜等。種咁多菜，唔通阿Ann打算轉行做農夫，種菜拎去賣？
阿Ann話，佢原本都想趁暑假去旅行放鬆一下，不過今年不論歐洲定美洲，天氣都特別熱，令怕熱嘅佢卻步。加上老公梁海明唔得閒，所以佢只好留喺香港過暑假，搵啲有興趣嘅嘢做吓。
收成有菜食 老公最開心
阿Ann一向都鍾意種嘢，最近佢就迷上咗水培種植，即係喺室內以水種植植物。佢又話自己份人「好實際」，所以都係種啲食得嘅植物，當然唔少得老公鍾意嘅豆苗啦。佢又話，佢種菜老公就最開心，因為每次收成時都可以親自收割，夠晒新鮮，而分量都夠兩口子食一餐咁話。