政情：葉劉轉戰超區陸頌雄率先陣亡
立法會後年先換屆，議員葉劉淑儀一早就部署由香港島直選改循有超級區議會（超區）之稱嘅區議會（二），坊間一直聚焦同屬超區議員嘅周浩鼎命途大受影響。不過，首當其衝嘅似乎係勞工界議員陸頌雄，喺葉劉改跑道嘅影響下，率先被搞到下屆無路可走。
超區呢個界別係最近兩屆立法會先有，一共有五席，過去兩屆建制派都派出三張名單出選，但最終只能拎到兩席。其中工聯會（工記）由陳婉嫻作開荒牛，喺二○一二年成功拎到一席，但上屆參選嘅王國興雖然取得廿三萬票，都要輸一萬票落選。
其他區難落腳 連任希望幻滅
目前兩個建制超區議員仍然年輕，定會繼續連任，所以工記想喺下屆捲土重來取回一席難度好高，再加上現時葉劉加入混戰，分薄票源，令工記嘅超區希望更加渺茫，連工記領導層都坦言，下屆派人再戰超區嘅機會極微。而即將做夠一屆議員嘅陸頌雄，因工記有每人只能做一屆嘅不成文規定，令佢失去咗所餘無幾嘅轉區落腳點，連任希望近乎幻滅。
早前有指陸頌雄同另一勞工界議員何啟明拗手瓜，以初選爭奪工記下屆出戰九東嘅機會。不過該名領導層分析，何啟明早喺九東做地區工作為下屆作準備，包括同地區組織、義工建立人脈關係，陸頌雄落九東難以挑戰何啟明。
至於工記喺新界西同港島分別有現任議員麥美娟同郭偉強，新東則有轉去沙田服務嘅離島區議員鄧家彪。數數吓，陸頌雄現時就只剩下九龍西。不過工記喺九龍西缺乏樁腳，而且因為年初補選關係，建制派已經喺九西取得三席，如果呢三位議員都爭取連任，勢必爭崩頭，所以陸頌雄連空降九龍西嘅空間都無乜添囉！
照咁睇，陸頌雄若想連任似乎只能打破現有嘅不成文規定，繼續留喺勞工界，但工記內部要等到明年區議會選舉後先有定案，但係若改變現有做法，始終會影響後生一批嘅上位機會，所以該名領導層就話，陸頌雄要爭取多啲表現，先有機會打破傳統畀佢連任多屆喇！