中環出更：羅致光延長產假 全靠女同事啟發
政府喺上周三公布施政報告提出爭取延長產假，由十周增至十四周，仲宣布即時適用於女性公務員。原來成功爭取呢項政策嘅人，唔係勞工及福利局局長羅致光，亦唔係公務員事務局局長羅智光，而係一位叫唔出名嘅女公務員。
與羅智光商討即拍板
羅致光尋日喺網誌自爆，有一日佢喺政府總部飯堂食晏時，有一位好面熟但自己似乎唔識嘅年輕女公務員，行埋嚟問佢，可唔可以考慮畀公務員早啲實行增加產假。當時佢呆一呆，坦承冇諗過呢個問題，話會考慮一下。當日佢即刻電郵諮詢特首意向，取得正面回應後，便與羅智光商討，只係幾日時間就拍板決定。
羅致光又話，新增嘅四星期產假薪酬全數由政府承擔，並非向商界「傾斜」，而係既要考慮對婦女嘅保障，亦要考慮僱主嘅責任和承擔能力。佢又引述國際勞工組織資料指，若由僱主支付全部有薪產假，將會嚴重影響婦女就業機會。所以佢呼籲包括社會福利機構等僱主，喺資源許可下，提早延長員工嘅有薪產假咁話。
卓妮