中環出更：騙徒入侵通訊App莊莎娜幸無損失
時下各種騙案屢禁不止，曾經盛行一時的電話騙案，已慢慢演變到利用電郵及社交媒體進行詐騙，而且手法愈見高明，真係一個唔小心就會中招。新銳珠寶設計師莊莎娜（Sarah）就試過畀騙徒入侵手機即時通訊應用程式（App），對方趁佢同朋友用文字訊息傾談時，突然致電繼續閒聊，令佢信以為真，依家諗起都覺得好得人驚。
Sarah話騙徒完全掌握到佢同朋友嘅訊息內容，所以就算對方把聲唔似，但係都成功令佢誤以為就係嗰位朋友。結果第二日騙徒即致電聲稱有交通意外，需要五萬元救急，Sarah心諗同嗰位朋友並唔太熟，對方無理由會開口，所以再傳訊息同朋友確認，先至揭穿騙局。
林景昇大談防範之道
本身係網絡安全和科技罪案調查專家嘅傑出青年協會前主席林景昇就解釋，其實黑客早已入侵即時通訊App，（目及）住目標人物同朋友通話內容先至出手，預防方法係啟用雙步驟認證，以增加保安程度。
呢日係金紫荊女企業家協會（協會）嘅午餐講座，籌辦今次活動的協會會員張蕙然話，正因為各種新型騙案手法推陳出新，所以就搵林景昇同一班好姊妹分享防範之道。出席者仲有保良局前主席梁寶珠女兒林玉茵、「手套大王」詹嘉莉、教育機構創辦人劉馬露明等人。
林景昇講嘢好風趣，同大家拆解網上情緣騙案、電郵騙案嘅手法，聽到台下眾人笑聲不斷。曾經喺銀行工作嘅協會主席丘璟珊就話，現時銀行經常打電話同客戶確認一啲交易係咪屬實，大家千祈唔好覺得煩，因為呢個係防止受騙的重要防線啦！
卓妮