政情：葉劉視網膜穿窿 急做激光手術
繼尹兆堅同黃碧雲之後，又多一個立法會議員有眼疾。邊個？就係身兼新民黨主席嘅葉劉淑儀囉！佢尋日喺社交平台貼文，自爆右眼視網膜穿窿。咁大件事？
葉劉話一直以嚟都為自己嘅良好視力而感到自豪，事關唔使戴眼鏡，即使年紀大咗，都可以睇報章或文件上嘅細字，早前做年度身體檢查，聽咗醫生提醒話眼睛都需要定期檢查，於是佢就約咗眼科專家進一步檢查眼睛，點知當醫生用藥水幫佢檢查眼底時，竟發現佢右眼視網膜有一個細窿。
佢話因為眼睛係由液體包裹，如果眼睛受壓，液體就可能會透過細窿湧出來，造成視網膜脫離，嚴重者可能引致失明，所以醫生建議佢立即進行激光治療，以激光將細窿嘅邊緣燒焦，令細窿唔會再擴大，於是佢就做咗手術。
又揭晶體渾濁 白內障先兆
不過，醫生幫佢檢查眼底時，發覺佢眼中嘅晶體亦開始變得渾濁，係白內障嘅先兆。睇嚟佢都要多加保護眼睛嘞！