政情:立會遇亂局照勸阻 容海恩:大家睇住我呀

好多懷孕媽媽做嘢都會小心翼翼,但佗BB嘅立法會議員容海恩(Eunice)尋日出席立法會前議員劉慧卿(卿姐)嘅網台節目同其他活動時,都着住一對粗踭高踭鞋,但卿姐就幫口,話Eunice嗰對唔係斗零踭。Eunice就話自己比較有正義感,懷孕期間若遇到有人喺立法會入面掟嘢,佢會照樣阻止同攔住對方,「所以大家睇住我呀!」嘩,聽落真係要大家手下留情啦!

打算日後餵母乳

佢話細個好似係飲奶粉嘅,但打算日後會餵母乳,每位媽媽每日大約要泵四至五次奶,聽講每次只會泵到少少,佢打算買個雪櫃仔存放。點解唔放喺茶水間個雪櫃呢?佢笑指「怕被人飲咗呀」。佢又話近年好多媽媽都好重視餵母乳,覺得會令BB多啲抗體,皮膚病又會少啲,如果餵唔到,好易會覺得唔開心。

自從佢懷孕後,外界開始關注立法會嘅育嬰設施,佢話議員房間有兩邊窗,五樓都會望到佢喺八樓嗰間房,另一邊又有男同事,即使拉埋窗簾,要餵母乳都好尷尬,希望立法會可以多啲育嬰設施。

第一手消息請下載on.cc東網iPhone/iPad/Android/Windows Phone Apps