政情：毛婆做泛民召集人兩派密謀架空

前身為泛民立法會議員溝通平台「飯盒會」嘅民主派會議喺一六年立法會換屆選舉後成立，召集人由各版塊協調推舉出任，並每年更替。繼民主黨立法會議員涂謹申同Charles先後出任召集人後，今年輪到主要由獨立民主派議員組成嘅議陣派人出任。

曾披露與建制私談內容

按喺議會年資，毛婆作為議陣嘅資深議員，代表議陣出任民主派召集人本來亦無不可。不過有建制派中人就話，佢哋過往試過私下同毛婆溝通同游說後，毛婆將有關內容喺公開會議上講番出嚟，令到建制派好尷尬，加上毛婆同泛民陣營關係亦麻麻，擔心由毛婆轉達建制派意思，會事倍功半，甚至令佢哋嘅原意走咗樣咁話，所以唔排除會逐個黨派接觸，唔再經毛婆去同民主派陣營溝通。

人緣差 被批冇動員能力

莫講話建制派對毛婆有微言，退出公民黨後自行成立議陣嘅毛婆，喺民主派亦都人緣欠佳。有民主派議員就質疑，毛婆一向我行我素，又冇乜組織動員能力，未必可以勝任召集人一職，加上毛婆平時立法會開會都好少「蒲頭」，一係就自己發言完就離開會議廳，都擔心喺關鍵時刻，佢係咪可以發揮到作用。

有見及此，民主派內部曾有人建議由另一議陣成員擔任民主派會議召集人，甚至一度破天荒增設「副召集人」一職，以「協助」毛婆處理召集人工作，實際上都係想將毛婆嘅角色淡化。不過因為最終議陣未有推舉出另一人選以及種種原因而作罷。

對於被指人緣唔好，建制派同民主派都想將其架空，唔知毛婆覺唔覺得自己需要檢討呢？點知毛婆就拒絕回應，仲一支箭走咗去。如果日後民主派面對棘手或尷尬問題，唔知毛婆係唔係都會拒絕回應呢？