中環出更：做足六年「阿二」葉建源有望坐正
立法會下周復會，又嚟到一年一度「爭櫈仔」大賽，角逐各事務委員會正、副主席一職。建制派同泛民喺今個星期已各自開會商討策略，最新消息指立法會教育界議員葉建源有機會坐正，擔任立法會教育事務委員會主席，擺脫做咗六年嘅「阿二」命！
稱不知所措 驚「表錯情」
早排曾經傳出，立法會教育事務委員會主席蔣麗芸會繼續連任，唔會讓出主席寶座。但建制派前日開會後，話鋒一轉，竟然有好消息畀泛民，畀葉建源坐正。葉回覆查詢時話覺得不知所措，啲消息轉來轉去，為咗唔好「表錯情」，都係結果出咗先再算。都啱嘅，做議員六年嚟首次有零的突破，仲係自己範疇嘅委員會，等坐正先開心都未遲。
不過泛民唔係個個都咁好命，好似房屋事務委員會副主席尹兆堅（肥尹），正正就係同人唔同命。由於房屋問題係重中之重，建制派一早吹風唔會放手畀肥尹坐正，依家更稱委員會主席麥美娟唔連任，熱門人選係同屬房委會委員嘅柯創盛，所以阿尹要繼續做「阿二」喇！
卓妮